Wikipedia est on pordjet po fé ene eciclopeye libe, sicrîte coperativmint, tot-z eployant li tecnolodjeye WikiWiki; dj' ô bén ki tot l' minme kî, vos avou, pout candjî les årtikes, i sufixh djusse di clitchî sol loyén «candjî l' pådje» k' i gn a so tchake årtike ki n' est nén metou come ene pådje protedjeye.

Li prumî pordjet Wikipedia (en inglès) a stî enondé li 15 di djanvî 2001; li ci e walon a cmincî li 20 d' djulete 2003, et i gn a disk' asteure 12 495 årtikes e walon, et co bén ds ôtes dins des ôtes lingaedjes. Tos les djoûs, des meyes di contribuweus do monde etir fijhèt des meyes et des meyes di candjmints et radjoutèt des hopeas di noveas årtikes dins les diferins wikipedias.

Tot l' contnou di Wikipedia est dizo l' licince di documintåcion libe di GNU. Les contribucions dmanèt li prôpieté di leus askepieus, dismetant kel licince di sôre copyleft permete kel contnou dmeure libe, sipårdåve eyet copiåve. Loukîz l' pådje so ls abondroets po pus di racsegnes.