Ekosistema di flora (manzanilla) na parke nashonal Shete Boka

Ekosistema di koral na Boneiru

Un ekosistema ta un sistema di interkambio entre tur bestia, mata, mikro-organismo (p.e., bakteria i beskem) denter di un área geográfiko spesífiko. Ekosistema ta okurí tur kaminda na mundu, for di exkosistemanan ekstenso, manera mondi i oséanonan, te na sistemanan mas chikitu i lokal manera un hardin.

E ta un área definí den naturalesa kaminda organismonan bibu (manera mata i bestia) i faktornan no-bibu (manera tera, awa i airu) ta interkambiá ku otro. Faktornan biótiko ta e interakshonnan biológiko denter di un ekosistema. Esakinan ta e influensianan ku matanan, animalnan i mikro-organismonan ta ehersé riba otro, komo resultado di kua huntu nan ta forma un komunidat. Tur organismo di e mesun espesie denter di un komunidat ta forma un poblashon. Ehèmpelnan di esaki ta e kompetensia entre matanan pa lus di solo. Faktornan abiótiko ta influensianan no-bibu ku ta afektá un ekosistema. Konsiderá e kantidat di áwaseru, e temperatura i e propiedatnan di e tera, manera fertilidat i struktura.

Mata, bestia i mikro-organismo ta biba huntu den un ekosistema. Nan ta dependé di otro, por ehèmpel pa medio di un wèp di kuminda. E pèrdida di un espesie por tin konsekuensianan drástiko pa e balansa, pasobra e otro organismonan ta direktamente òf indirektamente dependiente di e otro espesie.

Kada ekosistema ta úniko, formá pa un interkambio di karakterístikanan geográfiko, organismonan presente, i kondishonnan klimátiko. Sinembargo, interupshon eksterno, manera sekura prolongá, emishon di CO₂ na gran eskala, temblor, tormenta òf kandela di mondi por menasá e balansa delikado aki. Ora e preshon aki bira muchu grandi, ekosistemanan ta ser menasá, loke ta resultá den un bahada drástiko den biodiversidat, ekstinshon inumerabel di espesie, i kambio di klima.

Aunke ekosistemanan por funshoná sin intervenshon humano, e kontrario no ta bèrdat. Hende ta fundamentalmente dependiente di ekosistemanan pa nesesidatnan básiko manera awa, energia i otro rekursonan natural. Esakinan ta forma e base pa aktividatnan ekonómiko (p.e., turismo) i mantenshon di nivel di bida.^[1]