Si Mustafa Kemal Atatürk (1881 - Nobyembre 10, 1938) usa ka opisyal sa kasundalohan, rebolusyonaryong estadista, ug mao ang nagatukod sa Republika sa Turkey. Siya maoy unang presidente niini.

Si Mustafa Kemal nailhan tungod sa iyang intelehente ug maayong pagkakomander samtang nagserbisyo sa Sangka sa Gallipoli. Miapil usab siya didto sa mga prente sa silangang Anatolya ug Palestina, diin siya misikat niadtong Gubat Kalibotanon I. Human gipildi sa mga Alyado ang Imperyong Ottoman, gipangulohan ni Mustafa Kemal ang Nasodnong Kalihokang Turko. ANg maong kalihokan misangpot sa Turkong Gubat sa Kagawasan. Human gitukod ang usa ka gobyernong probisyonal didto sa Ankara, iyang gipildi ang mga pwersang gipadala sa mga Gahom nga Entente. Ang iyang mga nagmadaogong kampanyang militar maoy nakapadaog sa mga Turko, nga miresulta sa pagkatukod sa Republika sa Turkey.

Isip presidente sa Turkey, gisugdan ni Atatürk ang usa ka dakong repormang politikal, kultural, ug ekonomikanhon. Dako usab ang iyang gireporma sa edukasyon pinaagi sa iyang panguna sa pagbag-o sa Alpabetong Turko.