Contenitos de l'aduya de Biquipedia

A Biquipedia ye una enciclopedia libre, de gufanya, que se ye creyando en internet por usuarios de tot o mundo. L'obchectivo ye que cualsiquier persona tienga acceso a lo conoiximiento humano de traza libre y gratuita. Se construye con a colaboración desintresada d'os suyos usuarios. Ye decir, que tu mesmo, en iste mesmo inte, puez creyar un articlo u cambiar-lo ta correchir-lo u enamplar-lo. Contino, t'explicamos cómo.

Puez escribir-ie os tuyos propios contenius, u bien copiar-los u traducir-los dende o dominio publico, u dende cualsiquier atra fuent libre (p. eix., las edicions d'a Wikipedia en atras luengas). Pero para cuenta que muitas d'as pachinas d'o rete no son fuents libres. No copies en Biquipedia material con copyright!. Igual si los contenis son tuyos como si los has copiau d'una fuent libre, en publicar-lo en Biquipedia, atros usuarios pueden correchir-los, cambiar-los u destribuyir-los librement.

Prou que toz os articlos que se faigan han d'estar enciclopedicos y relevants (Biquipedia no ye un diccionario ni un repositorio de textos, ta ixo ya en i hai atros prochectos). Tamién has de respectar as politicas de Biquipedia sobre o Punto de Vista Neutral.

I hai quantas trazas de creyar un articlo nuevo:

• Si mirando-te belatro articlo trobas un vinclo en royo, puez punchar-lo, y t'amaneixerá una nueva pachina con un editor de texto an que puez pretar a escribir. Quan remates d'escribir, punchas Alzar pachina, que ye debaixo d'a finestra d'o editor de texto, a man cucha, y ya has creyato una pachina d'a futura enciclopedia en aragonés.

• Si quiers creyar un articlo de nuevas y no tiens garra vinclo royo, la traza más simpla ye escribir o nombre de l'articlo (como quieras que amaneixca titulau, con os suyos accentos y mayusclas) en o buscador que amaneixe a la tuya cucha, y punchar en o botón Ir-ie. Si no bi ye ya en la Biquipedia, amaneixerá un vinclo royo con o texto que has mirau. Si lo punchas, te saldrá una nueva pachina an que podrás prencipiar a escribir ixe articlo.

• Tamién puez escribir dreitament en la barra d'adrezas d'o tuyo navegador o nombre d'a nueva pachina. Asinas, si quereses escribir un articlo sobre Pedrón de casa Fustero d'A Fueva, caldría que i escribises

http://an.wikipedia.org/wiki/Pedrón de casa Fustero d'A Fueva 

en a barra d'adrezas d'o tuyo navegador. Decamín s'ubrirá una nueva pachina con una caixa d'edición an que podrás prencipiar a escribir.

Remera que dica que no punches en lo botón Alzar pachina, la pachina no quedará almadazenata en o sistema.

Ta cambiar, correchir u enamplar una pachina que ya existe, nomás te cal punchar lo botón Editar que ye en lo cobalto d'a pachina, y ya puez modificar, correchir u enamplar o que quieras. Ta que a pachina quede almadazenata has de punchar en o botón "Alzar pachina" que sale debaixo d'a caixa de texto. Ye bien fácil!. Si quiers estar seguro de que l'has feito bien, puez punchar antes en "Previsualizar".

Tampoco no t'ha de fer miedo d'estorbar bella cosa. A tecnolochía wiki fa que se puedan desfer toz os cambeos que faigas, asinas que no te'n faigas, puetz prencipiar a colaborar quan t'agane. Manimenos, si quiers fer en primerías bellas prebatinas, puetz ir t'a nuestra pachina de prebatinas.

Contino trobarás aduya sobre cómo dar formato a un texto. Manimenos, en los primers articlos que fagas, no pasa cosa si lo formato no ye correcto de tot. Bellatro biquipedista li dará formato y asinas podrás aprender millor a fer-lo.

Los textos en negreta, los títols de cabecera, las cursivas... s'han de fer con o codigo previsto ta cadagún d'ixos estilos. O más fácil ye emplegar o menú que amaneix en o cobalto d'a caixa d'edición. Ixe menú tamién permite ficar imachens, vinclos ta webs externos u a articlos d'a Biquipedia, u trestallar o texto con linias horizontals.

Pero lo millor y más rapido ye que prencipies a escribir dreitament o codigo. Asinas la negreta se fa abracando lo texto a destacar entre tres apostrofes. La cursiva se fa con dos apostrofes y las cabeceras con grupos de dos u tres signos =.

'''Iste testo saldrá en negreta'''
''Iste en cursiva''
==Iste ye un títol muit gran==
===Iste ye un títol subordinau a l'anterior===
====Y iste ye subordinato a l'anterior==== 

Ta divifir paragrafos, no ye prou con pretar a tecla "enter" una vegada. Has de fer-lo dos vegadas. Y si quiers que o paragrafo tienga sangría has de prencipiar a frase con dos puntos (:), (::) u (:::).

:Ista linia tien sangría.
::Ista ye más desplazada.
:::Más...
::::Dica a ón se puet plegar? :-)>

O codigo ta fer vinclos ye lo que más farás servir, y a escape te i farás. Un vinclo ta un articlo que ya existe en a Biquipedia se fa abracando con dos gafez o texto con o títol exacto de l'articlo. Si quiers fer o vinclo pero o títol no cuadra en o texto, tamién puez fer-lo. Por eixemplo, si quiers decir que belún ye francés, y quiers enlazar o chentilicio con l'articlo sobre Francia, lo puez fer asinas:

[[Francia|francés]]. D'ista traza, en o texto amaneixe nomás o chentilicio, pero si se puncha en él con lo ratet,
se'n va ta l'articlo sobre o país.

O procedimiento ta un vinclo externo ye similar, pero abracando con gafez simples l'adreza URL y o texto explicativo.

Asinas: [//an.wikipedia.org Biquipedia en aragonés]

Y ya lo tiens!. Quan lo tiengas tot feito, nomás has de punchar o botón de Alzar pachina. Si no i yes guaire seguro, d'haber-lo feito bien, puetz fer-le un golladeta punchando en Previsualizar.

• Categorías.

En Biquipedia ye muit important a categorización d'os articlos. Malas que remates d'escribir o tuyo articlo, has de mirar quala u qualas son as categorías más adecuadas. Si no existen, puez creyar-la(s). Ye de buen fer, nomás has d'escribir, a la fin d'o tuyo texto, o siguient codigo:

[[Categoría:la que siga]]

Si no ye creyada, amaneixerá o nombre d'a categoría en royo. Puncha-lo, y en a caixa de texto que amaneix escribe o codigo d'una categoría superior que ya exista. Por eixemplo:

[[Categoría:Colombofilia]]

Si no existise ixa categoría, podría seguir o vinclo y te levaría ta una caixa d'edición an que podría asociar-lo ta una u cuantas categorías superiors:

[[Categoría:Aficions]]
[[Categoría:Paloma]]

• Interwikis.

Tamién son a saber que importants as interwikis. Son os vinclos ta lo mesmo articlo en as Wikipedias en atras luengas. O codigo ta fer interwikis ye como o que se fa servir ta fer vinclos internos, pero con o codigo d'a luenga en qüestión. Istos interwikis se gosan meter siempre a la fin d'o texto de l'articlo, y se faría asinas:

[[ca:Asociación Colombófila Pixueta]]   (Ta o catalán)
[[es:Asociación Colombófila Pixueta]]   (Ta o castellán)
[[scn:Asociación Colombófila Pixueta]]  (Ta o secilián)

Por un regular, o más fácil ye copiar a lista completa d'interwikis editando l'articlo correspondient en as wikipedias más grans (en anglés, alemán, espanyol) y apegando-la en lo tuyo articlo.

• Títols y endreceras.

Un problema que se troba a sobén ye qual ha d'estar o nombre de l'articlo. Os dandalos arredol d'iste tema se pueden discutir en a Tabierna u en as seccions d'Uso d'a luenga. De todas trazas, por un regular trobarás cuantos posibles títols validos ta un articlo. Asinas, Diana Spencer bien pudiera estar Lady Di. Tamién podremos dubdar entre as diferents variants lexicas y/u foneticas d'o nombre: por eixemplo can u cocho, etc. A solución ye reendrezar una d'ellas enta lo que se considere que ha d'estar o títol prencipal. Asinas, si un escribe o nombre de Lady Di en o buscador, irá dreitament ta l'articlo de Diana Spencer. As endreceras son tamién de buen fer. Nomás has de creyar l'articlo ta o nuevo títol y escribir en la caixa d'edición o siguient codigo:

#REDIRECT:[[o que siga]]
Siguindo o eixemplo, en o nuevo articlo titulato Lady Di escribiremos:
#REDIRECT:[[Diana Spencer]]

Dimpués punchas en Alzar pachina y prou.

• Imáchens

Puez ficar en un articlo cualsiquier imachen que siga en o dominio publico, que no tienga dreitos d'autor, u tamién una imachen d'a que tu sigas l'autor y quieras meter en o dominio publico. Puez cargar-las en Biquipedia, fendo servir a opción cargar fichero. Manimenos, o millor y más fácil ye treballar con o reposte d'imáchens libres Commons. Astí puez trobar a-saber-las imáchens y debuixos ta ilustrar o tuyo articlo. Tú tamién puez cargar-ie imáchens y/u debuixos que haigas feito tu mesmo. L'avantalla ye que asinas podrán emplegar-las en todas as wikis. A traza d'usar as imáchens de Commons ye a mesma que si as imáchens son cargadas en a Biquipedia. S'ha d'emplegar o siguient formato:

[[Imachen:exemplo.jpg]] 

• Pachinas de descusión

I hai prous puestos an que puez expresar as tuyas opinions sobre os contenius, o formato, a luenga u l'estilo d'un articlo, asinas como comunicar-te con atros usuarios.

Toz os articlos tienen una pachina de discusión, an que puez fer comentarios sobre ixe articlo. A traza más fácil de ir ta una descusión d'articlo ye indo ta l'articlo y punchando en a pestanya que diz "descusión". Tamién puez meter dreitament en o tuyo navegador o nombre d'a pachina de descusión. Asinas, a pachina: http://an.wikipedia.org/wiki/Idioma alemán tien a suya descusión en http://an.wikipedia.org/wiki/Descusión:Idioma alemán.

Si quiers decir-le bella cosa á un usuario, puez fer-lo en a suya pachina de descusión.

A Tabierna ye un puesto ta discutir sobre temas chenerals de Biquipedia.

Acorda-te que no cal sinyar en las edicions d'articlos, pero sí quan escribas bella cosa en una pachina de descusión. Lo puetz fer de traza rapeda escribindo tres tildes ~~~ (saldrá nomás o tuyo nombre d'usuario) u quatre tildes (recomendable) ~~~~ (saldrá o tuyo nombre d'usuario y a calendata d'edición).

A tabierna ye pensada ta que os usuarios puedan charrar sobre o prochecto y preguntar y resolver dandalos, os unos a os atros.

En a recopilación de Preguntas Frecuents (FAQ) de Biquipedia puez trobar una lista de respuestas a preguntas frecuents ta nuevos usuarios.

Si nunca no has participau en una Wikipedia, puez vesitar l'ayuda en la Wikipedia en espanyol u en anglés, a on que puez aprender tot o que amenistes ta saber cómo construir una Wikipedia en a tuya luenga. Si no trobas a información que miras, puetz preguntar en a Tabierna, a on que de seguras, bell usuario se mirará d'aduyar-te.